Mag-inang amasona sumuko

CAMP GEN. ­SIMEON OLA, Legazpi City, Philippines —  Humabol sa masayang pagdiriwang ng bagong taon kasama ang pamilya ang isang mag-inang kadre matapos silang sumuko sa mga pulis sa Brgy. McArthur sa Monreal, Masbate kamakalawa ng umaga.

Kinilala ang mga sumuko na sina Nena Letada, 57-anyos at anak na si Noralyn, alyas “Ka Je-ann”, 24-anyos, dalaga at pawang kasapi ng Platoon 2, Larangan 1,Komite ng Partido 4 ng New People’s Army sa ilalim nang pamumuno ni Eleazar Ontog alyas “Ka Randy” na may malawak na operasyon sa Masbate.

Ayon kay Police Major Maria Luisa Calubaquib, tagapagsalita ng Police Regional Office (PRO) 5, sumuko ang mag-­inang amasona makaraan ang ilang negosasyon ng mga kasapi ng Masbate Police Provincial Office at 96th Military Intelligence Company kaugnay ng pinalawak na anti-cri­minality at insurgency ­operations.

Naging madali umano ang pagsuko ng mag-ina makaraang ipaliwanag sa kanila ang programang pangkapayapaan ng gobyerno sa ilalim ng Executive Order number 70 (EO70).

Pinuri naman ni PRO5 regional director Brig. Gen. Bartolome Bustamante ang mga tauhan sa mapayapa at matagumpay na pagsuko ng mga amasona at sinigurong matatanggap ng mag-ina ang mga benepisyo kaugnay ng kanilang pagbabalik-loob sa pamahalaan.