Sulu isasailalim sa lockdown, borders bantay-sarado
Para ‘di malusutan ng bagong COVID-19 variant mula Sabah
MANILA, Philippines — Inalerto na ni AFP-Western Mindanao Command Chief Lt. Gen. Corleto Vinluan Jr. ang tropa ng militar upang magbantay sa hangganan ng karagatan laban sa mga pupuslit na indibiduwal lokal man at dayuhan kaugnay sa ipatutupad na lockdown sa Sulu dahil sa banta ng panibagong variant ng COVID-19 mula sa United Kingdom na nakarating na sa Malaysia.
Ito ay kasunod sa anunsyo kahapon ni Sulu Governor Abdusakur Tan na sasarhan nila ang kanilang mga borders o hangganan sa karagatan mula Enero 4-17, 2021 upang pigilan ang pagpasok ng bagong coronavirus variant sa lalawigan.
Ang hakbang ay matapos maalarma ang pamahalaan sa report na ang bagong variant ng COVID-19 sa UK ay nakarating na sa Malaysia kaya nais ng lokal na pamahalaan ng Sulu na mapigilang kumalat ito sa lalawigan at iba pang bahagi ng bansa.
“The command supports the decision of the provincial government of Sulu and we already deployed additional troops to secure the border and to disallow entry of passenger vessels from Sabah,” ani Vinluan.
“Movement of all types of goods and basic commodities by land, air or sea will be unhampered. Officers and crews of cargo vessels shall observe precautionary measures set by the Sulu Task Force on COVID-19,” dagdag nito.
Inatasan din ang AFP, PNP at Philippine Coast Guard at iba pang ahensya ng gobyerno na bantayan at tiyakin na walang makakalusot sa back door entry na mga Jungkungs (bangka) at iba pang mga sasakyang pandagat papasok ng teritoryo ng Sulu.
Ang mga barko naman ng Naval Forces Western Mindanao ang magsasagawa ng patrolya sa maritime borders ng Sulu, Tawi-Tawi, Zamboanga Peninsula upang mapigilan ang pagpasok ng mga indibiduwal na may dalang virus.
Ang Sulu ay mananatiling nasa modified general community quarantine (MGCQ) hanggang sa Enero 31, 2021.
- Latest