7 terorista utas sa air strike at ground assault
Kasabay ng anibersaryo ng CPP-NPA
MANILA, Philippines — Pitong pinaghihinalaang miyembro ng teroristang New People’s Army (NPA) ang napaslang matapos na maglunsad ng serye ng air strike at ground assault operation ang tropa ng pamahalaan sa kanilang pinagkukutaan sa kabundukan sa hangganan ng bayan ng Palimbang at Senador Ninoy Aquino, Sultan Kudarat.
Ayon kay Col. Anhouvic Atilano, spokesman ng 6th Infantry Division ng Philippine Army (PA), inilunsad ang operasyon ng kanilang tropa upang palabasin sa kanilang lungga ang tinatayang nasa 100 NPA rebels na magsasagawa ng selebrasyon para sa ika-52 taong anibersaryo ng Communist Party of the Philippines (CPP)-NPA kahapon.
“The NPA members were supposed to hold a regional plenum for the CPP-NPA in the area,” ayon kay Atilano.
Sinabi naman ni Major Gen. Juvymax Uy, commander ng JTF Central at PA-6th Infantry Division (ID), pinangunahan ng 603rd IB ang air strike operations matapos na makatanggap ng intelligence report sa residente sa lugar ang presensya ng nagdadatingang malaking puwersa ng mga rebeldeng NPA sa bulubunduking bahagi ng Mt. Lumuton in Palimbang. Ang nasabing liblib na lugar ay tatlong araw bago marating kung ito ay lalakarin.
Sinabi ni Uy na gumamit ng GPS guided smart bomb na ibinagsak sa kuta ng mga rebelde ng FA 50 fighter jet ng Philippine Air Force (PAF) sa Daguma Mountain Range ng Sultan Kudarat.
“Gamit ang ating air assets at joint-combined arms operations, mabilis nating naitaboy ang tangkang pagtipon-tipon sana ng mga rebelde at itinayo natin ang bandila ng Pilipinas dito sa nakubkob natin na kuta ng NPA,” pahayag ni Uy. Sa isinagawang clearing operations sa lugar, narekober ng militar ang tatlong bangkay ng mga rebelde kabilang ang dalawang amasona habang ang iba pa sa mga labi ay tinangay ng mga nagsitakas na kasamahan.
Nasamsam din ang mga high powered firearms, IEDs (Anti-Personnel Landmines), laptops, 2 generator set, mga subersibong dokumento at iba pang war materials.
- Latest