Magat dam nagpakawala ng tubig sa 6 spillway gates

Cagayan at Isabela pinaghahanda sa matinding baha

TUGUEGARAO CITY, Cagayan, Philippines — Pinag­hahanda na ng awtoridad ang mga residente sa Cagayan at Isabela sa posibleng pagbaha ngayong araw (Linggo) matapos pagpasyahan ng pamunuan ng National Irrigation Administration (NIA) na buksan ang anim na spillway gates ng Magat dam kahapon ng hapon.

Ang pasya ay bunsod sa patuloy na pagtaas  ng antas ng tubig sa reservoir nito na umabot na sa critical level ng 191.8 metro o kulang sa dalawang Metro bago maabot ang 193 meters spilling level.

Ang pagtaas ng tubig ay nag-ugat sa walang puknat na pag ulan sa watershed areas ng dam dulot ng nararanasang amihan.

Ayon sa pabatid ng NIA-Magat River Integrated Irrigation System (MRIIS), dakong alas-5:00 ng hapon kahapon ay nakabukas na ang anim na spillway gates na may luwang na 12 meters total opening.

Matatandaan na noong nakaraang Nob­yembre, pitong spillway gates ang binuksan at nagpakawala ng tubig sa daluyang may luwang na 30 metro kayat nagmistulang isla ang lungsod ng Ilagan sa Isabela at ang lungsod na ito, pati na ang mga karatig nitong munisipalidad dahil sa pagtaas ng tubig.

Ayon sa NIA-MRIIS, may pahintulot ng Regional Disaster Risk Reduction Management Office (RDRMMO) ang ginawa nilang hakbang na magpakawala ng tubig sa anim na spillway gates.