Libreng dredging sa Cagayan River, kasado na
BAYOMBONG, Nueva Vizcaya, Philippines — Inaasahang maisasagawa na anumang araw ang libreng rehabilitation o dredging sa Cagayan River matapos lagdaan ang memorandum of agreement (MOA) ng Department of Environment and Natural Resources (DENR) at dalawang dredging companies na mamamahala sa paghuhukay.
Pinangunahan ni Regional Executive Director Gwendolyn Bambalan ng DENR Region-02 ang pagpirma ng MOA para sa Cagayan River Restoration Project sa panig ng pamahalaan habang kumatawan sa paglalagda sina Managing Head Antonio Talaue ng kumpanyang Great River North Consortium at President Feng Li ng Riverfront Construction Incorporated.
Ayon kay Bambalan, inaprubahan ng Inter-Agency Committee (IAC) ang River Dredging Plan (RDP) na may sukat na 30.8 kilometers mula sa pinaka-bukana ng Cagayan River sa bayan ng Aparri hanggang sa bayan ng Lal-lo pataas sa bayan ng Alcala bilang River Dredging Zone.
Ayon naman kay Gov. Manuel Mamba, pangulo ng IAC, isasagawa ng Great River North Consortium at Riverfront Construction Inc. ang river restoration na walang gastos ang pamahalaan kung kaya’t malaking tulong ito para maiayos ang daluyan ng tubig sa Cagayan River, ang tinaguriang pinakamalaking ilog ng Pilipinas.
Matatandaan na nitong bagyong Ulysses, lumubog ang halos lahat ng bayan sa Cagayan kung saan umabot sa 12 ang nasawi, halos kalahating milyong tao ang apektado at bilyong halaga ng mga pananim at ari-arian ang nawasak.
Ang Cagayan River na kilala ring “Rio Grande de Cagayan” ang daluyan ng nasa 20 na ilog mula sa mga lalawigan ng Ifugao, Nueva Vizcaya, Quirino, Isabela, Kalinga, Mt. Province at Apayao, kung kaya’t dito naiipon lahat ng mga tubig lalo sa panahon ng tag-ulan.
- Latest
