Dalagang bagong recruit ng NPA utas sa encounter

MANILA, Philippines — Patay ang isang 21-anyos na dalaga na bagong recruit ng mga rebeldeng New People’s Army (NPA) matapos na makasagupa ng mga sundalo ang komunistang grupo sa liblib na lugar sa Brgy. Mahawan, Kana­nga, Leyte nitong Biyernes ng hapon.

Kinilala ni Captain Kaharudin Cadil, Civil Military Operations (CMO) ng 802nd Infantry Brigade (IB) ng Philippine Army, ang nasawi na si Rochelle Mae Bacalso na binigyan ng mga alyas na “Ruth/Justine” bilang bagong recruit at kasapi Sub-Regional Committee Levox, Eastern Visayas Regional Party Committee, CPP-NPA-NDF (Communist Part of the Philippines-NPA-National Democratic Front).

Ayon sa militar, si Bacalso ay may ilang buwan nang nawawala matapos na malinlang ng grupo ng mga rebelde na nag-recruit dito habang inaalam pa kung isang estudyante ang dalaga nang ma-recruit ng NPA.

Bandang alas-3:35 ng hapon, ayon kay Cadil nang makasagupa ng ­operating troops ng 93rd-IB ang grupo ng mga rebelde. Tumagal ng mahigit 15 minuto ang palitan ng putok bago nagsitakas ang mga rebelde at inabandona ang nakalugmok na si Bacalso na naisugod pa ng mga sundalo sa Kananga Municipal Hospital pero idineklarang dead-on-arrival.

Narekober sa pinangyarihan ng engkuwentro ang isang Austrian-made Glock pistol, isang bandoleer ng M16 magazine, isang magazine ng M16 rifle na may 29 na bala ng cal 5.56, isang backpack ng mga personal na kagamitan, isang cellular phone, apat na duyan, apat na tents at mga subersibong dokumento.

Magugunita na si Bacalso ay isa sa mga kabataang target masagip ng mga sundalo mula sa NPA rebels na pinamumunuan ni Juanita Selleza alyas Ka Tibor  matapos na ma-recruit ng komunistang grupo.