Egg dealer tiklo sa pekeng sigarilyo
NUEVA ECIJA, Philippines — Inaresto ng pulisya ang isang 25-anyos na lalaking nagpakilalang egg dealer matapos na masamsaman ng 82 reams o 820 kaha ng pekeng sigarilyo sa Purok 3, Brgy. Sto. Cristo sa bayan ng San Antonio, dito kamakalawa ng tanghali.
Kinilala ng pulisya ang naarestong suspek na si Jun Pangilinan, binata, isang vendor ng Purok 4, Brgy. Lawang Kupang ng nasabing bayan.
Ayon sa pulisya, dalawang store owner ang nagreklamo sa kanilang himpilan na umano ay nabilhan nila ng pekeng sigarilyo ang isang nagro-rolling na lalaking vendor at doo’y inilarawan ang hitsura ng suspek.
Sa pagroronda ng mga operatiba, natiyempuhan nila bandang alas-12:22 ng tanghali noong Biyernes sa naturang lugar ang suspek na kamukha sa ibinigay na deskripsyon ng mga biktima.
Sinita ng mga pulis ang suspek na nagsabing isa siyang egg dealer, pero nang utusan ang suspek na buksan ang dalawang kahon na nasa sasakyan nito ay bumulaga ang kulay asul at berdeng sigarilyo na ang tatak ay “Two Moon”.
Nang hanapan ng kaukulang dokumento ang suspek ay wala siyang maipakitang katibayan na legal ang pagkakaroon ng mga pekeng sigarilyo sanhi ng kanyang pagkakaaresto habang kinumpiska rin ang kanyang dalang kolong-kolong na motorsiklo at ilang tray ng itlog.
- Latest