2,500 puno ng marijuana nadiskubre
KORONADAL CITY, Philippines — Nasa 2,500 na puno ng fully grown marijuana plants ang nadiskubre at binunot sa hangganan ng Sitio Alyong, Brgy. Danlag, Tampakan, South Cotabato at Sitio Atbol ng Kimlawis, Davao del Sur kahapon ng madaling araw.
Ang mga binunot na marijuana plants, ayon sa pulisya ay nagkakahalaga ng mahigit P200,000.
Kasama sa operasyon ng Tampakan Police na pinamumunuan ni Captain Ramel Aruelo ang mga kasapi ng Regional Mobile Force Police Battalion, Intelligence Unit at Police Drug Enforcement Unit ng PNP Region 12 katuwang ang 39th Infantry Batallion ng Philippine Army, mga barangay officials ng Danlag at Philippine Drug Enforcement Agency (PDEA) South Cotabato.
Natukoy ng pulisya ang may-ari ng natuklasang marijuana plantation na si Emmanuel Fernandez alyas “Commander Bobo” ng Barangay Poblacion, Tampakan pero wala siya sa plantasyon nang sumalakay ang mga awtoridad.
Karamihan sa mga binunot na marijuana plants ay sinunog ng mga pulis sa lugar habang ang ilang mga sample ay ikinustodya ng PDEA South Cotabato.
- Latest
