Motor salpok sa van: Rider, angkas patay
SANTIAGO CITY, Isabela, Philippines — Kapwa nasawi ang rider at angkas nito matapos sumalpok ang kanilang sinasakyang motorsiklo sa isang kasalubong na van habang bumabagtas sa national highway ng Barangay San Miguel sa bayan ng Luna, lalawigang ito kamakalawa ng hapon.
Kinilala ng Luna Police ang dalawang nasawi na sina Christian Cloyd Lopez, 33, at Roderick Aquino, 34, kapwa construction worker at residente ng Barangay Centro 2 sa nabanggit na bayan.
Sa ulat, umagaw umano sa linya ang motorsiklo na walang plaka ng mga biktima sa kasalubong na delivery van (DCP 4303) na minamaneho ni Reymund Collado, 21, ng Brgy. District 1, Benito Soliven, Isabela sanhi ng salpukan.
Dahil sa lakas ng impact, agad nasawi si Lopez habang ang backrider na si Aquino ay binawian din ng buhay matapos isugod sa pinakamalapit na ospital.
Boluntaryo naman na sumuko sa himpilan ng pulisya ang driver ng sasakyan na si Collado matapos ang insidente.
- Latest
