Hepe ng pulisya sa Palawan sinibak!

Matapos ang ambush-slay ng isang abogado

MANILA, Philippines — Dahil sa sunud-sunod na insidente ng patayan sa Palawan kabilang ang naganap na pananambang sa isang abogado na nagbibigay ng pangamba sa mga residente, sinibak sa puwesto ang Police Provincial director na si P/Col. Dionisio Bartolome.

Batay sa General Order Number 236 na may petsang November 21, 2020, kinailangang alisin sa puwesto si Bartolome upang bigyang daan ang imbestigasyon laban sa kanya hinggil sa kakulangan sa pagpapatupad ng kanyang tungkulin.

Ayon kay Police Regional Office 4-B (Mimaropa) spokesperson Lt. Col. Imelda Tolentino, tila hindi umano masawata ni Bartolome ang mga krimen sa kanyang nasasakupan.

Ang pinakahuling insidente ng pamamaril ay ang pamamaslang kay Atty. Eric Jay Magcamit na tinambangan at pinagbabaril ng hindi pa rin natutukoy na mga suspek.

Sinabi ni Tolentino, papalitan ni P/Col. Nicolas Torre III, kasaluku­yang deputy regional director for operations ng PRO-4B ang maiiwang puwesto ni Bartolome.

Itinalaga naman ni PRO-4B regional police director B/Gen. Nicerio Obaob si Torre na pamunuan ang Special Investigation Task Group (SITG) Magcamit.