Lider ng Abu Sayyaf, 1 pa utas sa encounter
MANILA, Philippines — Patay ang isa umanong Abu Sayyaf Group (ASG) sub-leader at miyembro nito nang makaengkuwentro ng militar sa magkahiwalay na lugar sa Sulu kahapon.
Ayon kay Western Mindanao Command (Westmincom) chief Lt. Gen. Corleto Vinluan Jr., habang nagsasagawa ng combat operations ang Marine Battalion Landing Team-1 (MBLT-1) sa Brgy. Kawasan dakong alas-5:45 ng madaling araw nang makasagupa nila ang Abu Sayyaf sub-leader na si Hatib Munap Binda sa Panamao, Sulu. Tumagal ang engkuwentro ng 30 minuto kung saan napatay si Binda at narekober ang M16 rifle at M14 rifle nito.
Si Binda ay sinasabing senior leader ng nasabing terror group na nagsasagawa ng illegal na operasyon sa munisipalidad ng Kalingalan Caluang at Panamao, Sulu. Sangkot ang grupo nito sa serye ng kidnapping sa mga boundaries ng Malaysia, Indonesia at Pilipinas.
Dakong alas-6:45 naman ng umaga nang mapatay ang bandidong si Bensio Barahama matapos ang 20 minutong bakbakan sa pagitan ng MBLT-1 sa pamumuno ni Colonel Marvin Salvan. Nakuha dito ang isang M14 rifle.
Si Barahama ay ama umano ni ASG leader Sansibar Bensio na nag-o-operate sa Panamao, Omar at Luuk. - Rhoderick Beñez
- Latest
