73 dating rebeldeng NPA tumanggap ng P1.4 milyong ayuda
SANTIAGO CITY, Isabela, Philippines — Tumanggap ng tulong pinansyal ang 73 na dating miyembro ng New People’s Army (NPA) na unang nagbalik-loob sa pamahalaan para harapin ang kanilang bagong buhay.
Sa ulat ng Department of Social Welfare and Development (DSWD)-Cagayan Valley (Region-02), ang mga dating rebelde na tumanggap ng tulong mula sa gobyerno ay kinabibilangan ng 39 mula sa Isabela at 34 mula sa Cagayan.
Ayon kay Assistant Regional Director Lucia Allan ng DSWD-Region 02, ang pinansyal na tulong ng gobyerno ay mula sa “sustainable livelihood program” ng DSWD bilang bahagi ng pagpapatupad sa Enhanced Comprehensive Local Integration Program (ECLIP) sa ilalim ng National Task Force to End Local Communist Armed Conflict (ELCAC).
Bukod sa P20,000 na naipagkaloob sa bawat benepisyaryo ay tumanggap din ng karagdagang halaga ang mga dating rebelde na nagsuko ng mga armas.
Ayon sa pamunuan ng 5th Infantry Division ng Philippine Army na nakabase sa Gamu, Isabela, bukod sa mga tulong pinansyal ay nagtatag na rin ng komunidad ang kasundaluhan para roon manirahan ang mga nagbalik loob na NPA rebels habang karamihan sa kanila ay nagbalik sa eskwelahan para magkaroon ng mas magandang kinabukasan.
- Latest
