7 pulis-HPG nalason sa isda
LEGAZPI CITY, Albay , Philippines — Pitong miyembro ng Philippine National Police-Highway Patrol Group (PNP-HPG) na nakatalaga sa loob ng Camp Gen. Simeon Ola ang isinugod sa medical dispensary unit matapos na malason ng isda na kanilang binili, niluto at kinain kamakalawa ng tanghali, dito sa lungsod.
Kinumpirma mismo ng medical dispensary doctor na si Major Vangie Villamor na food poisoning ang nangyari sa pitong pulis na hindi na binanggit ang mga pangalan. Nasa stable na umanong kalagayan ang mga biktima.
Sa ulat, kasama ang helper na si Sonny Mallanta ay magreport sa Daraga Police si Master Sgt.Nerissa Feliciano makaraang malason ng kinaing tulingan ang kanyang pitong kasamahan.Bumili umano ng isdang tulingan na pinaniniwalaang sira na agad nitong iniluto at inihain para sa pananghalian.Gayunman,ilang sandali makaraang kumain ay sumakit ang ulo,tiyan at nagsuka ang mga biktima kung saan ang iba ay nahimatay pa dahil sa hilo kaya mabilis silang isinugod sa medical dispensary.
Sa imbestigasyon, nakilala ang tindera ng sirang isda na si Emma Neo,residente ng Brgy.Bagumbayan,Daraga na nangako namang sasagutin ang gastusin sa pagpapagamot ng mga pulis.
- Latest
