Barilan ng HPG at ‘Navy’ sa Cavite: 2 utas, 3 sugatan
MANILA, Philippines — Patay ang isang miyembro ng Cavite Highway Patrol Group (HPG) at isang nagpakilalang sundalo ng Philippine Navy habang tatlong iba pa ang sugatan matapos ang kanilang engkuwentro dahil sa sinitang sasakyan na walang plaka kahapon sa Cavite City.
Sa inisyal na ulat ng pulisya, dakong ala-1:00 ng hapon habang nagsasagawa ng anti-carnapping operation ang grupo ng HPG sa pamumuno ni Police Capt. Eduardo Guadamor kasama sina P/CMS Julius Arcalas at P/Staff Sgt. Emerson Domingo sa Manila-Cavite Road, Brgy 8, Pulo 3, ng nasabing lungsod nang maispatan nila ang isang silver gray Nissan Terra na walang plaka kaya agad itong pinara at sinita.
Tumigil naman umano ang sasakyan at nang hingan ng mga dokumento ng sasakyan ang dalawang sakay ay nagpakilala silang mga Navy.
Ayon pa kay Domingo, may nakita pa siyang uniform ng Navy na naka-hanger sa likod ng nasabing sasakyan.
Dito na umano biglang itinaas pasara ang bintana ng sasakyan ng mga suspek at sa puntong ito, bumaba ang isa sa kanila at saka pinaulanan ng bala gamit ang cal 5.56 bushmaster ang mga HPG operatives.
Dahil dito, napilitan umanong gumanti ng putok ang tropa ng HPG kaya napatay ang isa sa suspek pero mabilis na nakaharurot ang kasama nito palabas ng bayan ng Noveleta.
Bukod sa mga pulis, tinamaan din ng ligaw na bala si Eduardo Magbana pero si Arcalas ang napuruhan sa ulo kaya’t dead-on-arrival sa Cavite Medical Center.
Kasalukuyan nang nagsasagawa ng manhunt operation ang mga awtoridad at inalarma na rin ang lahat ng bayang puwedeng daanan ng suspek. Bineberipika na rin ang pagkakakilanlan ng napatay na suspek.
- Latest