72-anyos na tumatawid sa highway, pisak sa bus
KABASALAN, Zamboanga Sibugay, Philippines — Hindi na umabot ng buhay sa ospital ang isang 72-anyos na lalaki nang ito ay masalpok at mapisak ng bus habang tumatawid sa national highway sa Purok 3, Brgy. Buayan, kamakalawa ng gabi.
Ang biktima ay nakilalang si Angeles Antiquina.
Sa ulat ng Police Regional Office (PRO) 9,alas-7:20 ng gabi ay tumatawid ang biktima sa kahabaan ng national highway nang aksidente itong masagasaan ng Rural Transit Bus (JVH 362) na minamaneho ni Teresito Salve Forsuelo Jr., 47.
Hindi umano napansin ng driver ang pagtawid ng matanda dahilan madilim sa bahagi ng nasabing lugar kung saan tuluy-tuloy nitong nasagasaan ang biktima.
Agad namang sumaklolo ang rescue team at isinugod sa pagamutan ang matanda pero nabigo ng maisalba ang buhay nito.
Nasakote naman ng mga nagrespondeng operatiba ng Kabasalan Municipal Police Station (MPS) ang driver ng bus na ngayo’y nakakalaboso na sa detention cell ng nasabing himpilan kaugnay ng kasong kriminal na kinakaharap nito.
- Latest
