Nurse na naka-quarantine timbog sa shabu
NORTH COTABATO, Philippines — Sa kabila na maraming medical frontliners ang abala sa pagtulong sa mga may sakit ng COVID-19, isa namang nurse sa bayan ng Midsayap, dito ang lumihis ng landas matapos sabayan ang kanyang trabaho ng hinihinalang pagtutulak o paggamit ng ipinagbabawal na droga kamakalawa.
Ayon sa pulisya, naaresto sa isang drug operation sa Twin Cubs Haven Inn na ginawang quarantine area pasado alas-2 ng hapon nitong Martes ang nurse na kinilalang si Julius Ceasar Duque, residente ng Poblacion 4, Midsayap.
Nabatid na naka-isolate ang suspek sa nasabing inn at nakatakda na sana niyang lumabas kahapon ngunit dahil sa kahina-hinalang galaw nito sa tuwing may naghahatid sa kanya ng pagkain ay agad na isinuplong sa mga otoridad.
Nakumpiskahan ng mga pulis ang suspek ng nasa P500 halaga ng shabu.
Malaki ang posibilidad na maaaring gumagamit ng droga ang suspek habang naka-quarantine, ayon pa sa otoridad.
Ito na ang ikalawang pagkakataon na naaresto ang suspek dahil sa pag-iingat ng shabu.
- Latest