Bangkay ng transgender itinapon malapit sa ancestral house ng mayor

TUGUEGARAO CITY, Cagayan, Philippines — Nag-iwan ng misteryo ang pagtapon ng isang bangkay ng umano’y transgender malapit sa ancestral house ni Mayor Jefferson Soriano Soriano sa lungsod na ito kahapon na may mga saksak sa katawan.

Ayon sa report, matigas na ang bangkay at nakatakip pa ng sako nang madiskubre ni Roger Attaban, isang kawani ng city hall sa gilid ng Pattaui StreetBarangay Ugac Norte, alas-6:00 ng umaga kung saan ay may 40 metro ang layo mula sa ancestral house ng alkalde.

Ayon sa mga imbestigador wala namang koneksiyon sa opisyal ang krimen na itinapon sa lugar upang iligaw ang mga otoridad.

Sinabi naman ni Mayor Soriano na sinusuri ng otoridad ang mga CCTV sa lugar upang matukoy ang mga salarin ng transgender.

Unang inakala ng mga nagrespondeng pulis na bangkay ng bakla ang natagpuan ni Attaban dahil mayroon itong Adam’s apple bagama’t nakasuot ng pambabae.

Subalit sinabi ni Police Staff Sergeant JJ Dela Cruz na ari ng babae ang taglay ng bangkay matapos niyang ipasilip sa punerarya.