Magalong aminadong ‘high risk’ sa COVID-19 ang Baguio City
Pero kontrolado ang sitwasyon
TUGUEGARAO CITY, Cagayan, Philippines — Bagama’t aminadong mataas ang kaso ng COVID-19 sa kanyang teritoryo matapos bansagan ng UP Octa Research bilang isa sa mga “high risk” areas sa bansa, idiniin ni Baguio City Mayor Benjamin Magalong na kontrolado ng kanyang pamunuan ang sitwasyon.
Sa kanyang pulong balitaan kamakalawa, sinabi ng alkalde na ang Baguio City ay may mataas na testing capacity sa pagtukoy ng mga nagpositibo ng virus. Aniya, mayroon silang kabuuang 59,392 RT-PCR at 6,000 antigen tests na naisagawa at patuloy na susuriin ang kabuuang 370,000 populasyon ng lungsod.
Inamin ni Magalong na sinalanta ang Baguio ng mga kaso ng hawaan nitong mga nagdaang linggo. Partikular na tinukoy nito ang insidente ng laklakan sa bahagi ng slaughterhouse area subalit naagapan ang pagkalat nito dahil sa masusing contact tracing.
Sinabi ni Magalong na mataas ang kanilang contact tracing efficiency ratio at sagana ang lungsod sa mga gamit sa pagsasagawa ng pagsusuri.
Nitong linggo lamang, tinukoy ng nasabing research body ang Baguio City na pumapangalawa sa Makati City na pinaka-high risk area sa COVID-19; pangatlo ang Mandaluyong City na sinundan ng Lucena City at Pasig City bilang pang-apat. Sumunod pa sa listahan ang Iloilo City, Pasay City, Marikina City, Ilagan City sa Isabela at Batangas City.
- Latest
