Binata inutas sa harap ng bahay
LEGAZPI CITY, Albay , Philippines — Bulagta ang isang 30-anyos na binata matapos na pagbabarilin sa harap mismo ng kanilang bahay ng ‘di kilalang dalawang suspek sa Brgy. Tinago sa bayan ng Aroroy, Masbate kamakalawa ng umaga.
Napuruhan ng punglo sa ulo at agad nasawi ang biktimang si Ryan Magdaraog Lustistica, residente ng nasabing barangay.
Sa ulat, dakong alas-5:30 ng umaga habang nakatayo ang biktima sa harap ng kanyang bahay nang biglang sumulpot mula sa kanyang likuran ang gunman habang ang isa nitong kasama ay nagsilbing lookout.
Bago pa nakakilos ang biktima ay mabilis na siyang binaril sa ulo ng gunman at nang bumulagta ay ilang beses pang pinaputukan.
Nang matiyak na napuruhan ang biktima, mabilis na tumakas ang mga suspek patungo sa hindi malamang direksyon.
Inaalam pa ng pulisya ang motibo sa pagpatay habang nakuha sa crime scene ang limang basyo ng bala ng kalibre 45 na baril.
- Latest
