P19 milyong marijuana sinunog sa Cordillera

MANILA, Philippines — Nasa P19-milyong halaga ng marijuana na nadiskubre sa iba’t ibang bulubunduking plantasyon sa Cordillera ang sinunog kahapon,

Personal na sinaksihan ni PNP chief P/Gen. Camilo Cascolan ang pagsunog sa P19-milyong halaga ng marijuana matapos ang kanyang pagbisita sa Police Regional Office-Cordillera.

Sinabi ng PNP chief na pinasisiguro niya na sa pagbubunot ng marijuana plants ay kasama ang mga ugat nito para masiguro na hindi na uli ito tutubo pa.

Pinuna kasi ng mga lokal na mamamahayag na tila paulit-ulit na lang ang mga lugar kung saan nadidiskubre ang taniman ng marijuana.

Nagbigay pa ng direktiba ang opisyal sa mga local police commanders na balik-balikan ang mga naunang lugar kung saan sinira ang mga plantasyon para masiguro na hindi na muling magtatanim ng marijuana roon.

Magugunitang ipinag-utos ni Pangulong Rodrigo Duterte na agad wasakin ang nakukumpiskang ebidensiya sa.anti-illegal drug operation ng awtoridad upang mawala ang duda na nare-recycle pa ito at muling naibebenta sa mga adik..