Ilagan City idineklara na ‘critical zone’
TUGUEGARAO CITY, Cagayan, Philippines — Dahil sa walang puknat na community transmission ng COVID-19 sa mga barangay sa Ilagan City, idineklara na ni Isabela Governor Rodolfo Albano III ang lungsod bilang “critical zone”.
Kasabay nito, inatasan ni Gov. Albano si Dr. Manuel Mamba ng karatig lalawigan ng Cagayan na higpitan pa ang border control sa mga tumatawid patungo sa kanyang teritoryo mula sa Isabela.
Sa tala, umabot na sa 74 bagong kaso ng COVID-19 sa Ilagan City, Isabela tatlong araw mula nang ideklara ito sa ilalim ng enhanced community quarantine (ECQ) noong Biyernes na tatagal hanggang Oktubre 30.
Ayon sa Provincial Inter-Agency Task Force (PIATF) on the Management of Emerging Infectious Disease, 19 bagong kaso ang naitala kahapon, 47 noong Linggo at walo noong Sabado.
Sinabi naman ni City Mayor Jose Marie Diaz na umabot na sa nakakaalarmang 335 ang kaso ng COVID-19 doon at 204 ang aktibo noong Oktubre 15.
Sa huling tala, ang Isabela ay may 446 na aktibong kaso ng COVID-19.
- Latest