Babaerong mister kinatay ni misis!
Parehong umuwing lasing galing laklakan
LEGAZPI CITY, Albay , Philippines — Dahil sa umano’y pagiging babaero, isang mister ang nasawi sa kamay mismo ng sariling misis matapos siyang saksakin sa dibdib sa gitna ng kanilang mainitang pagtatalo nang umuwing parehong lasing galing sa laklakan sa Brgy. Cabihian, Virac, Catanduanes kamakalawa ng gabi.
Tinangka pang isugod sa pagamutan ng mga kapitbahay pero hindi na umabot nang buhay ang biktimang si Fidel Galicia Idanan, 50-anyos, habang agad na naaresto ang misis niyang si Cherlly, 48-anyos; pawang residente ng nasabing barangay.
Sa ulat, dakong alas-8:20 ng gabi, kapwa umuwing lasing sa kanilang bahay ang mag-asawa galing sa pakikipag-inuman sa isang okasyon sa Brgy. Palta Big. Gayunman, habang nag-uusap ang dalawa ay biglang naungkat ng ginang ang umano’y pambabae ng mister dahilan para magkaroon sila ng mainit na pagtatalo.
Bunsod sa kalasingan at matinding selos, tila nawala sa katinuan ang ginang hanggang sa kumuha ng kutsilyo at agad na itinarak nito sa kaliwang dibdib ng asawa.
Nang makitang duguan ang mister, agad na tumakas ang misis habang nakahingi pa ng saklolo ang una sa kanilang kapitbahay pero idineklara na siyang dead-on-arrival sa Catanduanes Doctors Hospital.
Agad rumesponde ang mga pulis at naaresto ang misis na nahaharap sa kasong parricide.
- Latest