Cotabato massacre: 4 babae patay, 4 sugatan
NORTH COTABATO, Philippines — Patay ang apat na babae kabilang ang isang 3-anyos na bata habang apat pa nilang kamag-anak ang sugatan matapos silang pasukin sa bahay at pagbabarilin ng hindi nakilalang mga suspek sa Sitio Tugunan, Brgy. Lagunde, Pikit, Cotabato, kahapon ng tanghali.
Kinilala ng Pikit Police ang mga nasawi na sina Sittie Alipolo Abdullah, 58-anyos; Zenaida Abdullah Mustapha, 36, may asawa at dating OFW; Laga Abdullah, 34, dalaga, walang trabaho at ang batang si Ashley Abdullah Panigas.
Inoobserbahan naman sa ospital ang mga sugatan na sina Asria Abdulrajak Abdullah, 30 anyos, may asawa, at tatlong menor-de-edad na itinago sa mga pangalang Ryan, 13-anyos; Raad, 7, at Asya, 8.
Sa inisyal na imbestigasyon ng mga otoridad, habang nagpapahinga ang magkakamag-anak sa Sitio Tugunan nang biglang dumating ang apat na armadong lalaki at agad silang pinaulanan ng bala pasado alas-12:00 ng tanghali saka nagsitakas.
Nagkaroon ng maraming tama ng bala ang apat sa walong mga biktima na siyang naging sanhi ng kanilang agarang kamatayan habang mabilis na dinala ang apat na sugatan sa Cruzado Medical Hospital.
Narekober ng mga pulisya sa pinangyarihan ng krimen ang basyo ng bala ng M16 armalite rifle.
Patuloy ang ginagawang hot pursuit operation ng 90th Infantry Battalion Alpha Company laban sa mga suspek habang blangko pa ang pulisya sa motibo ng mga suspek sa pagpatay sa naturang pamilya na idinamay pa pati mga bata.
- Latest