61-anyos lola pinasok, kinatay ng dayo
LUPAO, Nueva Ecija, Philippines — Patay ang isang 61-anyos na lola makaraang pagtatagain ng isang dayong lalaki na bigla na lamang umanong pumasok sa bahay ng matanda sa Brgy. Sto. Domingo ng bayang ito noong Huwebes ng gabi.
Ayon sa pulisya, nanonood ng telebisyon ang biktimang si Leodivina Disierto, may-asawa, bandang alas-7:30 ng gabi nang biglang pumasok sa bahay nito ang suspek na si Danny Blanco, residente ng Brgy. Maasin, Talugtug, NE.
Nabatid sa mga kaanak ng biktima na nagulat na lamang sila nang biglang pumasok ang suspek na may dalang itak na panabas at walang sabi-sabing pinagtataga ang lola na nagre-relax at nanonood ng balita sa TV.
Matapos ang isinagawang krimen, lumabas ng bahay ang suspek at naglakad lang paalis sa crime scene.
Sinubukan namang isugod ang biktima sa San Jose City General Hospital pero dito siya nalagutan ng hininga habang pinaghahanap na ng pulisya ang suspek.
- Latest
