Kapitana, tresurero ng barangay patay sa ambush
Legazpi CITY, Albay , Philippines — Parehong bulagta ang isang chairwoman at treasurer ng barangay matapos harangin at pagbabarilin ng mga armadong suspek habang pauwi lulan ng motorsiklo sa bulubunduking lugar ng Sitio Gumian, Brgy. Sinungtan sa bayan ng Guinobatan, dito sa lalawigan kamakalawa ng hapon.
Dead-on-the-spot makaraang mapuruhan ng punglo sa katawan ang mga biktima na kinilalang si Kapitana Luzviminda Dayandante at tresurerong si Albert Orlina, kapwa residente ng Brgy. Batbat ng nasabing bayan.
Sa ulat, dakong alas-3:50 ng hapon habang magkaangkas na binabagtas pauwi ng mga biktima lulan ng motorsiklo ang kahabaan ng kalsada sa nasabing lugar nang paulanan sila ng bala ng mga ‘di kilalang salarin.
Narinig ng mga residente ang magkakasunod na putok ng baril. Nang kanilang tingnan ang pinanggalingan ng mga putok ay nakitang duguan at parehong patay na ang mga biktima.
Hindi agad nakaakyat ang mga mag-iimbestigang pulis sa pinangyarihan ng krimen bunsod ng pagiging kritikal ng lugar dahil ito umano’y pinamumugaran ng mga rebeldeng New Peoples Army.
Kinumpirma ni Mayor Gemma Ann Onjoco na galing ng munisipyo ang mga biktima at pauwi na lulan ng motorsiklo nang mangyari ang pamamaril.
- Latest