Buntis, 4 pang kapitbahay nahawa sa COVID-19 sa tomaan
TUGUEGARAO CITY, Cagayan - Lima pang katao kabilang ang isang tatlong buwang buntis sa lungsod na ito ang pinakahuling nagpositibo kahapon sa COVID-19 na nag-ugat sa laklakan na umano’y isang opisyal ng barangay ang nagpasimuno.
Ayon sa City Health Office, ang 27-anyos na buntis ay nakaranas ng pag-ubo at kasamang nakatira sa iisang bahay ng dalawa pang nagpositibo sa virus. Isa ring trese anyos na dalagita ang nahawa sa kanyang ka-edad na kasama sa kuwarto. Ang dalawa ay kapitbahay ng nasabing buntis.
Isang binatilyo at dalawa pang binata na umano’y nakipag-inuman sa lugar ang nagpositibo at mga pawang isinailalim sa home quarantine.
Naunang nagpositibo sa COVID-19 ang walong katao sa iisang barangay na kung saan sinasabing nagpainom ang isang opisyal noong nakaraang linggo kahit na katatapos lamang nitong sumailalim sa swab test.
Ang nasabing opisyal ay kasama ng tatlo pang kaanak na nagpositibo matapos magkaroon ng exposure sa kanyang bayaw na namatay dulot ng kumplikasyon sa COVID-19 sa Cagayan Valley Medical Center noong nakaraang Linggo.
- Latest
