Magsasaka binistay ng bala sa harap ng pamilya
LEGAZPI CITY, Albay, Philippines — Hindi na nakabangon ng higaan ang isang 27-anyos na mister matapos siyang pasukin at pagbabarilin ng anim na pinaniniwalaang mga miyembro ng New People’s Army (NPA) sa harap ng kanyang pamilya sa Purok-2, Brgy. Dalipe, Cawayan, Masbate kamakalawa ng madaling araw.
Agad nasawi matapos mapuruhan ng mga bala sa iba’t ibang bahagi ng katawan ang biktimang si Edmond Sulacito Hingco, may-asawa, magsasaka at residente ng nasabing barangay habang tumakas ang mga rebelde patungo sa direksyon ng Brgy. RM Magbalon.
Sa ulat, dakong ala-1 ng madaling araw habang nasa kasarapan ng tulog ang biktima at pamilya nito nang biglang dumating ang anim na armado at puwersahang pumasok sa bahay. Bago pa nakakilos ang mister sa pagkakahiga ay pinagbabaril na siya ng mga suspek. Hindi naman sinaktan ang pamilya nito na natulala sa nangyari.
Napagdudahan umanong informer ng mga pulis at sundalo ang biktima kaya siya nilikida ng mga rebelde.
- Latest
