MECQ sa Solano hinirit na palawigin
TUGUEGARAO CITY, Cagayan, Philippines — Dahil sa patuloy na pagtaas at malawakang hawaan na sumabay pa sa ikaapat na kamatayan ng isang COVID-positive na pasyente kahapon, hiniling ng lokal sa Inter-Agency Task Force on COVID-19 na palawigin ang umiiral na modified enhanced community quarantine (MECQ) sa Solano, Nueva Viscaya hanggang sa Septyembre 30.
Ipinatupad ang MEQC sa Solano noong Sept. 1 matapos itong aprubahan ng regional IATF at tatagal sana hanggang sa Martes lamang.
Kahapon din inihayag ng Provincial Health Office na ang ikaapat na namatay sanhi ng komplikasyon sa COVID ay isang mister matapos ang dalawang linggong pagkakaratay sa Region 2 Trauma and Medical Center sa Bayombong.
Samantala, iniutos ni Solano Mayor Eufemia Dacayo ang paglalagay ng mga talipapa sa bawat barangay upang maibsan ang pagkalat ng mga tao sa pamimili ng kanilang pagkain at kagamitan sa iisang lugar. Ito ay matapos na karamihan sa mga COVID patients ay nasagap ang virus sa kanilang public market at municipal slaughterhouse.
Sa tala, 119 na ang active COVID-19 cases sa Solano at 10 dito ang nakarekober habang apat ang nasawi.
- Latest