Bahay ni lola ginawang drug den: 9 tiklo
CAVITE MANILA, Philippines — Siyam katao ang naaresto matapos ang ginawang pagsalakay ng pulisya sa bahay ng isang 67-anyos na lola na hinihinalang ginawa nitong drug den sa Brgy. Maliksi 1, lungsod ng Bacoor kahapon ng madaling araw.
Kinilala ang mga suspek na sina Luzviminda Reyes alyas “Luzviminda San Jose”, ang lolang target ng buy-bust; Lorence Hernandez, 42; Wilma Salcedo, 50; Raymond Banting, 38; Jovany Jorca, 40; Edgardo Filosopo, 59; Anthony Villarmente, 38; Mark Novelo, 36 at Michael Dorongon, 39, habang nakatakas sa operasyon ang kanilang kasamahan si Leo Balais.
Sa ulat, alas-2 ng madaling araw nang ilatag ng DEU operatives at PDEA agents ang buy-bust laban sa lolang suspek.
Nang magpositibo ang operasyon, dinakip ang lola pero naaktuhan ng mga pulis ang iba pang katao sa loob ng bahay nito na nagsasagawa ng shabu session kabilang si Hernandez, empleyado ng Philippine Statistics Office (PSA) na suki na umano ng matanda.
Nasamsam sa lugar ang 7-plastic sachet ng shabu, digital scale, mga drug paraphernalia at marked money na ginamit sa operasyon.
- Latest