Pulis na senglot nagwala, arestado

LEGAZPI CITY, Albay , Philippines — Kalaboso ang isang lasing na pulis matapos arestuhin ng kanyang hepe makaraang walang habas na nagpaputok sa kanilang police station sa Brgy. Bayombon, Masbate City, Masbate kamakalawa ng hapon.

Kinilala ang suspek na si P/Staff Sgt. Raul Limates Assuncion, 44-anyos, may-asawa ng Brgy. Pating, nasabing lungsod at nakatalaga sa Police Community Precinct 5 ng Masbate City Police.

Sa ulat, simula alas-4 ng hapon ay inabot hanggang gabi sa pakikipagtomaan si Limates sa kanyang kabarong si Cpl. John Kenneth Martinez.

Gayunman, nang malasing pinagsabihan si Limates ng kanyang team leader na si P/Master Sgt. Alfredo Ulanday pero dahil sa kalasingan ay minasama ito ng una kaya nagpaputok gamit ang kanyang M16 armalite rifle at kalibre 45 baril dahilan para arestuhin na siya ni Ulanday.