9 timbog sa illegal logging
Pulis idinawit, hepe sibak
SANTIAGO CITY, Isabela, Philippines — Arestado ang isang pulis at 9 katao dahil sa illegal logging sa Aglipay, Quirino habang nadamay na masibak sa puwesto ang hepe ng una dahil sa command responsibility kamakalawa.
Kinilala ang mga suspek na sina Redentor Silao, 39; Marjole Silao, 37; Jaynard Ladia, 32; Jerick James Tiburcio, 27; Francis Ladia, 27; Donato Abon, 27; Felipe Mercado, 40; Marcelo Lumosan, 27, at Regie Reyes, 42, pawang residente ng Brgy. Palacian, Aglipay.
Agad namang sinibak sa puwesto at nahaharap sa kasong criminal at administratibo si P/Cpl. Grengo Frank Browner Eustaquio, nakatalaga sa Cabarroguis Police Station, matapos siyang isangkot sa illegal logging.
Ayon kay P/Lt. Scarlette Enriquez, tagapagsalita ng Quirino Provincial Police Office, nagsagawa ng operasyon ang Aglipay Police at Regional Integrity Monitoring Enforcement Team na nagresulta sa pagkakadakip ng mga suspek at pagkakabawi ng nasa 2,221 board feet na pinutol na mga kahoy lulan ng isang Isuzu forward truck (RBH 282) sa Brgy. Victoria, alas-4:00 ng hapon.
Nakuha ng pulisya ang isang cellphone mula kay Marjole Silao at dito nakita ang mga palitan nila ng text messages ni Eustaquio na agad hinuli ng mga kabaro sa followup operation sa Cabaroguis Police Station.
Sinabi ni Enriquez na command responsibility naman ang dahilan ng pagsibak sa acting chief ng Cabaroguis Police dahil sa pagkakasangkot ni Eustaquio sa illegal logging.
- Latest
