3 pulis sa naka-lockdown na istasyon, may COVID-19
TUGUEGARAO CITY, Cagayan – Tatlong pulis na kabilang sa 24 personnel ng Tuguegarao Police Station na kasalukuyang sumasailalim sa 2-linggong lockdown ang nagpositibo sa COVID-19 kahapon.
Kinumpirma ni Dr. Glenn Mathew Baggao, hepe ng Cagayan Valley Medical Center na nasa pangangalaga na nila ang isa sa mga pulis na may pinakitang sintomas.
Ang dalawa pang nagpositibong pulis ay asymptomatic at isinailalim na sa home quarantine.
Matatandaan na nagkulong sa loob ng police station ang 23 pulis at hepe nilang si Lt. Colonel Jonalyn Tecbobolan na nag-utos ng 2-linggong lockdown matapos na magpositibo sa coronavirus ang isa nilang sibilyan na empleyado noong Agosto 17, na siya namang posibleng nakahawa.
Sinikap kontakin ng PSN si Tecbobolan at ang mga pulis na nasa loob ng istasyon subalit walang sumasagot sa mga tawag sa cellphone na lumikha ng pag-aalala sa publiko ukol sa kasalukuyan nilang kalagayan
Maging ang katabing City Hall ay isinailalim na sa lockdown upang isagawa ang disinfection matapos magawi roon si Tecbobolan at kanyang mga tauhan, ayon sa tagapagsalita ni Mayor Jefferson Soriano.
Lumalabas na may 10 katao na ang naitalang nahawaan ng pamilya ng naturang empleyado ng nasabing police station na nagmula sa walong barangay ng lungsod. Kasama ng kawani na unang nakitaan ng virus ay ang mister at ama nito.
- Latest
