'Kahit quarantine': 73 Tsino, 3 Pinoy tiklo sa online pasugalan sa Cagayan
MANILA, Philippines — Arestado ang ilang dosenang Tsino at mga Pilipino matapos ang ikinasang operasyon ng Philippine National Police (PNP) sa probinsya ng Cagayan, Martes nang gabi.
Ayon sa ulat ng DZRH ngayong umaga, nasakote ang mga suspek sa isang hotel na matatagpuan sa bayan ng Sta. Ana, Cagayan.
Kasama sa mga nahuli ang 73 Chinese nationals at tatlong Pilipino sa Villa Saturnina Hotel and Resort sa Sitio Rafat, Rapuli.
Kinilala ng mga media report ang mga Pilipino bilang sina Erwin Digol, Alexis Isaac Ferro at Mylene Tuazon, na pare-parehong empleyado ng hotel.
Sa kasamaang palad, nakatakas naman mula sa kamay ng hustisiya si Frank Yu, na kinikilalang manager at "utak" diumano ng mga operasyon.
Arestado ang 73 Chinese at tatlong Pinoy sa Sta. Ana, Cagayan dahil sa iligal na online gambling. Nakatakas naman ang itinuturong manager na si Frank Yu, base sa report ng otoridad.
— News5 AKSYON (@News5AKSYON) August 5, 2020
Nasamsam ang 103 laptops at mga desktop na ginamit ng mga suspek. | via Cris Sansano pic.twitter.com/l7ATNX7Uc7
Kasama sa mga nasamsam ng pulisiya ang 103 laptop at desktop computers, na siya raw ginagamit sa mga iligal na operasyon.
Kasalukuyang nasa ilalim ng modified general community quarantine (MGCQ) ang probinsya ng Cagayan bunsod ng patuloy na paglaganap ng coronavirus disease (COVID-19) sa Pilipinas habang nasa ilalim naman ng modified enhanced community quarantine (MECQ) ang Metro Manila.
Una nang sinabi ng Malacañang noong Abril na ipinagbabawal pa ang Philippine offshore gaming operators (POGOs), na pinagtratrabahuhan ng maraming Tsino, at iba't ibang uri ng sugal sa mga lugar na nasa ilalim ng maluwag na general community quarantine (GCQ).
Gayunpaman, pinapayagan na ng Inter-Agency Task Force on Emerging Infectious Diseases (IATF-EID) ang "partial operations" ng mga nasabing pasugalan, kahit sa ilalim ng mahigpit na enhanced community quarantine (ECQ) sa dahilang kinikilala ito bilang business process outsourcing (BPO).
"All BPOs are allowed to operate on limited capacities, so POGOs will be allowed to maintain a skeletal workforce of 30 percent in areas under ECQ," ayon kay presidential spokesperson Harry Roque noong Mayo 2020. — may mga ulat mula kay News5/Cris Sansano
- Latest
