3 inmates sa Rizal namatay sa pneumonia
RIZAL, Philippines — Binawian ng buhay dahil sa sakit na pneumonia ang tatlong preso sa dalawang bayan ng lalawigan ng Rizal, kamakalawa.
Ang mga nasawi ay kinilalang sina Liberato Reyes; Jojit Morales; at Ruben Tuazon, pawang nasa hustong gulang at nahaharap sa magkakaibang kaso na hindi na tinukoy pa ng mga otoridad.
Sa ulat ng Rizal Police Provincial Office (RPPO), unang namatay si Reyes habang nilalapatan ng lunas sa Cainta Municipal Hospital dakong alas-10:00 ng umaga kamakalawa matapos na dumaing na nahihirapang huminga noong gabi ng Hulyo 21 at na-confine sa pagamutan ngunit binawian din ng buhay dahil sa pneumonia/PTB (pulmonary tuberculosis).
Sumunod na binawian ng buhay si Morales dahil din sa sakit na pneumonia dakong alas-5:04 ng hapon kamakalawa na na-confine sa sakit na diabetes ngunit dinapuan ng pneumonia na nagresulta sa pagkamatay nito.
Sa ulat ng Antipolo City Police,alas-5:30 ng hapon kamakalawa nang isugod si Tuazon sa Rizal Provincial Hospital System Annex 2, sa Barangay Dalig matapos na mahirapang huminga at namatay dahil sa septic shock. Nabatid na dumaranas din ito ng severe pneumonia.
- Latest