Mayor sa South Cotabato itinumba!
SOUTH COTABATO, Philippines — Patay ang isang alkalde ng lalawigang ito na dating nasa drug watchlist ni Pangulong Rodrigo Duterte matapos pagbabarilin ng riding-in-tandem habang nag-iinspeksyon ng kanyang ipinagagawang proyekto at isa ang sugatan matapos tamaan ng ligaw na bala sa Purok Libertad, Barangay Poblacion sa bayan ng Santo Niño kahapon ng umaga.
Sa ulat ng Santo Niño Police, kinilala ang nasawi na si Santo Niño Mayor Pablo Matinong, 55-anyos, habang ginagamot sa Luntao Clinic and Hospital ang nasugatan na si Analyn Avance Piñafiel, 42-anyos.
Sa imbestigasyon, alas-8:00 ng umaga habang mag-isang naglalakad at tinitingnan ng alkalde sa ipinagagawa nitong proyekto sa lugar nang pagbabarilin ng isa sa dalawang suspek sa ulo. Minalas namang tamaan ng ligaw na bala si Piñafiel.
Nang masigurong patay na ang alkalde, mabilis na tumakas ang mga suspek lulan ng motorsiklo.
Isinugod pa sa ospital ang alkalde pero idineklara siyang dead-on-arrival ng mga sumuring doktor.
Si Matinongay isa sa mga nasa drug watchlist ni Pangulong Duterte noon pero nalinis na nito ang kanyang pangalan.
Ang alkalde ang nagpaangat at nagpaunlad ng bayan ng Sto. Niño matapos na payagan nitong mamuhunan ang mga malalaking negosyo sa bayan.
- Latest