18 tenants at vendors nagpositibo sa COVID, public market ipinasara
RIZAL, Philippines — Ipinasara at isinailalim sa 14-days lockdown ang New Public Market sa Antipolo City matapos na magpositibo sa coronavirus disease 2019 (COVID-19) ang 18 tenants at vendors ng naturang pamilihan.
“Sa bisa ng isang closure order na ipinalabas ngayong araw, June 30, 2020, pansamantalang ipinasara ang Antipolo New Public Market matapos magpositibo sa RT-PCR COVID test ang 18 tenants at vendors nito sa isinagawang expanded targeted testing ng pamahalaang lungsod sa nasabing establisyimento,” anunsiyo ni Antipolo City Mayor Andrea Ynares sa isang Facebook post kamakalawa ng hapon.
Dahil dito, agad na nagpatupad ng perimeter control ang pulisya at barangay upang tiyakin na walang makakapasok sa nasabing establisimyento habang epektibo ang temporary closure sa loob ng 14 araw, batay sa umiiral na panuntunan at magsasagawa rin ng disinfection operations sa pamilihan.
Anang alkalde, Hunyo 25, 2020 nang suriin ang halos 800 tenants at empleyado ng New Public Market at 28 sa kanila ang nag-positibo sa IgM anti-body Rapid test.
Ang 28 IgM positive at 20 iba pang nakitaaan ng sintomas ng sakit ay agad na isinailalim sa RT-PCR test kung saan sila ay kinunan ng swab samples at dinala sa DOH accredited laboratory testing center. Dito nakumpirma na 18 sa kanila ang positibo sa COVID-19 kaya’t kaagad na isinailalim sa mandatory quarantine simula pa noong Hunyo 25.
Sa mga nagpositibo sa sakit, 15 ang residente ng Antipolo habang ang tatlo ay nakatira sa ibang bayan.
- Latest
