Trike vs motor: 1 todas, 1 sugatan

LOPEZ, Quezon, Philippines — Hindi na umabot pang buhay sa ospital ang isang tricycle driver habang malubhang nasugatan ang isang rider makaraang magbanggaan ang kanilang mga sasakyan sa highway na sakop ng Brgy. Bacungan, kamakalawa ng gabi.

Nagtamo ng grabeng pinsala sa ulo si Bernabe Escobar, 34, may asawa ng Barangay Villahermosa na kanyang ikinasawi habang patuloy na nilalapatan ng lunas sa Magsaysay District Hospital sanhi ng mga sugat sa iba’t ibang parte ng katawan si Mark Lawrence Coron, 35, ng Barangay Rizal, Poblacion ng nasabing bayan.

Ayon sa ulat ng pulisya, bandang alas-7:30 ng gabi ay kapwa binabagtas ng mga biktima ang kahabaan ng highway nang agawin ng suspek na sakay ng motorsiklo ang linya ng kalye ng biktimang nagmamaneho ng tricycle sanhi ng banggaan.

Sa lakas ng impact. kapwa tumilapon ang mga biktima na ikinasawi ng isa habang nagtamo ng malaking pinsala ang kanilang mga sasakyan.