60-anyos pumalag sa kawatan, kinatay
PAGBILAO, Quezon, Philippines — Brutal na kamatayan ang sinapit ng isang 60-anyos na binata matapos na katayin ng hindi kilalang salarin na nanloob sa kanyang bahay sa Sitio Riverside, Barangay Binahaan, dito sa bayan, kamakalawa ng umaga.
Halos maputol na ang leeg at nagmistulang kinatay na hayop ang katawan dahil sa rami ng tinamong saksak at taga ng biktimang si Hilario Dequiros, magsasaka.
Ayon kay P/Maj. Reden Romasanta, chief of police dito, noong gabi ng Hunyo13 ay nakarinig ng mga kalabog mula sa bahay ng biktima ang kanyang mga kapitbahay subalit ipinagkibit-balikat lamang nila ito sa pag-aakalang walang nangyayaring hindi maganda sa matandang binata.
Subalit dakong alas-6:00 ng umaga ay natuklasan ang biktima na wala nang buhay at naliligo sa sariling dugo.
May teorya ang pulisya na nanlaban ang biktima sa hindi nakikilalang suspek na pumasok sa kanyang bahay kung kaya tinuluyan siyang paslangin.
- Latest