Police station inatake ng Abu Sayyaf: 2 parak utas

MANILA, Philippines — Patay ang dalawang pulis habang dalawa pang kabaro ang sugatan nang salakayin ng pinaniniwalaang mga miyembro ng Abu Sayyaf Group (ASG) ang Parang Municipal Police Station sa Sulu kamakalawa ng gabi.

Dead-on-arrival sa  Parang Municipal Hos­pital sina Patrolman Arjun Putalan at Corporal Mudar Salamat habang ginagamot sa nasabing ospital ang dalawa pang pulis na sina Exe­cutive Master Sergeant Hamin Sarribon at Senior Master Sergeant Harold Nieva.

Sa report na nakarating sa Camp Crame, dakong alas-6:30 ng gabi nang lumusob ang hindi pa batid na bilang ng mga armadong grupo sa Parang Municipal Police Station na matatagpuan sa Brgy. Poblacion, Parang, Sulu.

Pinaputukan ng ma­tataas na uri ng armas ng mga suspek ang nasabing istasyon ng pulisya dahilan upang dumepensa ang mga nasorpresang pulis na naka-duty ng mga oras na ‘yon para ipagtanggol ang kanilang station.

Ang palitan ng pu­tok ay tumagal ng ilang mi­nuto na ikinalagas ng da­lawang pulis habang nasugatan ang dalawa pa.

Tumakas ang mga hinihinalang terorista pa­tungo sa bayan ng Indanan.

Naglunsad na ng ope­rasyon ang militar at ele­mento ng PNP Special Action Force (PNP SAF) laban sa mga tumatakas na mga bandido.