Cavite massacre: 3 patay!
Kagawad naburyong dahil sa matinding selos
CAVITE, Philippines – Karumal-dumal na pagkamatay ang sinapit ng tatlong babae kabilang ang isang mag-ina makaraang imasaker ng isang barangay kagawad na dating kinakasama ng isa sa mga biktima dahil sa matinding pagseselos kamakalawa ng gabi sa Brgy. Paliparan 3, Dasmariñas City.
Kinilala ang mga napatay na sina Rogima Sambalunes, 44-anyos, anak nitong si Kemberly, 23, at isa pang kamag-anak na si Ronalyn Baculao, 33; pawang residente ng Blk 201, Phase 5, Brgy. Paliparan 3, Dasmariñas City, Cavite.
Naaresto naman ang suspek sa follow-up operation ng pulisya na si Reynaldo Bucal, nasa hustong gulang, dating live-in partner ni Rogima at kagawad sa naturang barangay.
Sa imbestigasyon ni SPO1 Elmo Caboboy, alas-8:22 ng gabi nang magtalo ang mag-live-in partner dahil sa umano’y selos.
Matinding galit umano ang umiral sa suspek hinggil sa umano’y hindi pag-amin ng biktima na may ibang karelasyon at umayaw na muling makipagbalikan.
Dahil dito, agad na bumunot ng baril ang suspek at pinagbabaril ang ginang at isinunod si Baculao. Nagawa namang makatakbo palabas ng bahay ang anak ni Rogina na si Kemberly subalit dito na siya inabutan ng pagkamatay.
Mabilis na tumakas ang suspek sakay ng kulay green na Hi-Ace van (TRI 739) pero agad na naaresto ng mga rumespondeng pulis.
- Latest