1 pa dedo sa buy-bust

NUEVA ECIJA, Philippines — Patay ang isang hinihinalang drug suspect matapos makipagbarilan sa mga pulis sa isinagawang buy-bust operation sa Brgy. General Luna, Zaragosa, dito kahapon ng madaling-araw.

Sa ulat ni P/Major Jaime Ferrer, hepe ng Zaragosa Police Station, nakilala ang suspek na si August Madrid, ng Blk 19, Cecilia Village, Cabanatuan City. Sa ulat, ala-1:30 ng madaling-araw, nagsagawa ng buy-bust operation ang pulisya sa naturang lugar nang makatunog umano ang suspek na pulis ang kanyang ka-transaksyon.

Tinangkang barilin ng suspek ang mga operatiba pero sumablay na sinundan ng barilan na ikinabulagta ng suspek. Nakuha sa crime scene ang 10 sachet ng hinihinalang shabu, P500 marked money, motorsiklo (8495 HY) at kalibre .38 na may 4 na bala Nabatid na nasa talaan ng drug watchlist ng Cabanatuan City Police Station ang suspek.