Dalagita ginahasa, pinatay sa maisan
MAGUINDANAO, Philippines — Isang dalagita ang natagpuang patay sa isang maisan sa Sitio Rakef, Barangay Blensong, Upi, Maguindanao.
Hinihinalang ginahasa bago sinakal hanggang mapatay ang biktimang si Baby Jane Francisco, 15- anyos, residente sa nabanggit na lugar.
Ayon kay Police Staff Sgt. Vincent Gamino, hepe ng Upi Municipal Police Station, pasado alas-8:00 ng umaga nitong Miyerkules nang makatanggap ng tawag ang kanilang himpilan mula sa barangay official na nagsasabing may natagpuang bangkay sa maisang bahagi ng Sitio Rakef.
Sa inisyal na pagsisiyasat ng mga pulisya, pinaniniwalaang pinatay sa sakal ang biktima dahil may nakataling jogging pants sa kanyang leeg.
Napag-alaman din ng pulisya na noon pang Linggo nawawala ang biktima subalit hindi ito inireport ng kanyang mga magulang sa mga awtoridad.
Hanggang sa natagpuan na lamang itong wala nang buhay sa gitna ng taniman ng mais sa Sitio Rakef.
Napunta ang biktima sa lugar kasama ang dalawa pa nitong kapatid upang dumalo lamang sa isang handaan noong gabi ng Sabado (March 7) subalit hindi na ito nakauwi pa sa kanilang bahay.
Sa ngayon, nagsasagawa na ng malalimang imbestigasiyon ang pulisya para matukoy ang suspek at mapanagot sa batas.
- Latest
