Pastor na kagawad, itinumba
MANILA, Philippines — Patay ang isang pastor makaraang pagbabarilin ng apat na hindi pa nakilalang mga armadong kalalakihan sa Brgy. Camindangan, Sipalay City, Negros Occidental kamakalawa.
Kinilala ang nasawi na si Pastor Lonie Lahao-Lahao, 54, ng Church of the Living God at Kagawad sa Brgy. Camandangan ng lungsod.
Sa report ni Lt. Col. Neceraro Sabando, Officer-in-Charge (OIC) ng Sipalay City Police, nangyari ang insidente habang ang biktima at misis nito ay lulan ng tricycle pauwi na sa kanilang tahanan.
Ayon sa opisyal, hinarang ng mga armadong salarin ang tricycle na sinasakyan ng biktima at agad na pinagbabaril ng mga suspect ang target na pastor. Mabilis namang tumakas ang mga salarin matapos ang isinagawang krimen.
Patuloy naman ang masusing imbestigasyon sa krimen kung saan kabilang sa sinisilip na motibo ay pulitika at personal na galit.
- Latest