Mag-asawa dedo, anak kritikal
Dump truck salpok sa van
MANILA, Philippines — Patay ang isang mag-asawa habang malubhang nasugatan ang 8-anyos nilang anak na lalaki makaraang aksidenteng mabangga ng isang rumaragasang truck ang sinasakyan nilang van sa Brgy. San Juan, Sta Lucia, Ilocos Sur kamakalawa.
Kinilala ang mga nasawi na sina James Oliver Marzan, isang OFW at misis nitong si Rho Ann; kapwa 34-taong gulang ng Poblacion West, Pidigan, Abra at pawang dead-on-arrival sa Sta. Lucia District Hospital dahil sa tinamong matinding pinsala sa kanilang katawan. Patuloy namang nilalapatan ng lunas ang kanilang anak na si Michael Alfred Marzan.
Sa ulat ng Ilocos Sur Police, bandang alas-6:02 ng umaga habang lulan ang tatlo ng Nissan van (NDQ-209) na minamaneho ng nasabing mister nang aksidente itong mabangga ng humahagibis na Isuzu dump truck (URV 930) na minamaneho naman ni Geronimo Valdez Jr, 51, pagsapit nila sa nasabing lugar.
Nabigo ang driver ng van na galing sa katimugang direksyon na iwasan ang paparating na dump truck na sobrang tulin ang takbo sanhi ng salpukan.
Wasak ang van kung saan naipit sa kanilang upuan sa harap si Marzan at misis na si Rho Anne.
- Latest