Van bumaliktad: 3 guro patay, 8 pa sugatan
TUGUEGARAO CITY, Cagayan, Philippines — Tatlong guro ng pampublikong paaralan ang nasawi habang malubhang nasugatan ang walo pa nilang kabaro na dadalo sana sa Kalinga “Bodong Festival” nang bumaligtad ang sinasakyan nilang van sa bulubunduking highway ng Sitio Lonnog, Brgy. Mabaca, Tanudan, Kalinga noong Biyernes ng gabi.
Sa report na nakarating kay Kalinga Police Director Colonel Job Russell Balaquit, nawalan ng kontrol sa manibela ang driver na si Fernando Ducasao sa pabulusok at kurbadang daan bunsod upang sumalpok ang kanilang behikulo sa konkretong barrier sa tabi ng highway bago ito tuluyang bumaligtad nang ilang ulit pababa sa matarik na highway dakong alas-6:30 ng gabi.
Bunga nito, agad nasawi ang mga gurong sina Roderick Sucliyao at Marcelina Dupagan Sapon habang dead-on-arrival sa ospital si Cresencia Wandag Cayangao.
Magkahiwalay namang isinugod sa Kalinga Provincial Hospital at Cagayan Valley Medical Center ang mga nasugatang guro na sina Ariane Cathleen Dalanao, Alister Dalanao, Hubert Abowac, James Abowac, Ralyn Dao-ayan, Leonida Puctiyao, Francisca Addagan at drayber na si Ducasao.
Nabatid na patungo ang mga biktima sa isinasagawang trade fair kaugnay sa pagdaraos ng taunang Bodong Festival at ika-25 Kalinga Founding Anniversary sa kabisera ng Tabuk City nang maganap ang aksidente.
- Latest