P30 milyong proyekto ng TESDA sa Bulacan, sinimulan
GUIGUINTO, Bulacan, Philippines — Sinimulan na ng Technical Education Skills and Development Authority (TESDA) ang pagtatayo ng kanilang mga bagong pasilidad na nagkakahalaga ng P30 milyon sa lalawigang ito, iniulat kahapon.
Pinangunahan nina Senador Joel Villanueva at TESDA Director General Isidro Lapeña ang groundbreaking ng itatayong two-storey dormitory at multi-purpose gymnasium sa Regional Training Center dito.
Ang P30 milyong proyekto ay maaaring matuluyan ng mga trainees mula sa malalayong bayan tulad ng San Miguel, Donya Remedios Trinidad, Norzagaray, San Ildefonso, San Rafael, Angat at iba pa na kasalukuyang sumasailalim sa skills training program ng TESDA.
Ayon kay Villanueva, ang nasabing proyekto ay hindi lamang maghahatid ng quality skills training kundi magbibigay rin ito ng oportunidad para makakuha ng magandang trabaho ang mga kababayang Bulacaneos. Malaking bagay aniya ang proyekto lalo na sa mga kababayan na gustong makapag-aral at makapagsanay na nagmula pa sa malalayong lugar.
May sukat na 357 metro kwadrado ang dalawang palapag na dormitoryo na kayang magtira ng 50 trainees at magagamit bilang laboratoryo. Samantala, may 708 metro kwadrado ang multi-purpose gymnasium na gagamitin naman para sa mga graduation at iba pang seremonya ng TESDA.
Inaasahang matatapos ang konstruksyon nito sa Oktubre.
- Latest