Dalaga kinaladkad bago kinatay
LEGAZPI CITY, Albay, Philippines – Karumal-dumal na kamatayan ang sinapit ng isang 26-anyos na dalaga matapos pasukin at kaladkarin ng dalawang hindi nakilalang lalaki palabas ng bahay at pinagtulungang pagtatagain hanggang mapaslang sa Sitio San Roque, Brgy. Rizal sa Monreal, Masbate kamakalawa ng gabi.
Naliligo sa sariling dugo at patay na nang matagpuan ng mga kaanak, may 30-metro ang layo mula sa kanilang bahay ang biktimang si Shiela Arizala, residente ng nasabing barangay.
Ayon sa ulat, dakong alas-7 ng gabi habang nag-iisa sa loob ng kanilang bahay si Arizala nang puwersahang pumasok ang hindi nakilalang mga lalaki na armado ng itak. Kinaladkad ang biktima palabas ng kanilang bahay at nang sa ‘di kalayuan ay pinagtulungang pagtatagain sa kabila ng palahaw at pagmamakaawa nito.
Tumakas ang mga suspek matapos masigurong patay ang biktima.
Hindi pa malaman ang pagkakakilanlan at motibo ng mga suspek habang patuloy ang ginagawang imbestigasyon ng pulisya sa kaso.
- Latest