Mag-asawa, anak kinatay matapos laitin ang manugang
NORTH COTABATO, Philippines — Karumal-dumal ang sinapit ng isang pamilya na kinabibilangan ng isang mag-asawa at menor-de-edad na anak matapos silang pagsasaksakin at pagtatagain ng kanilang kapamilya na umano’y nainsulto sa panlalait ng biyenan sa loob ng kanilang tahanan sa Sitio Lambukon, Barangay Canahay, Suralla, South Cotabato, kamakalawa ng gabi.
Kinilala ng pulisya ang mga napatay na sina Benevicto Calibayan, 53-anyos, misis na si Hapelina, 52, at anak na si Victoria, 15-taong gulang, pawang ng nasabing lugar.
Nahaharap naman sa kasong multiple murder ang suspek na si John Jobert Dones alias Jun-Jun Tiko, 31-taong gulang at residente ng Barangay Canahay sa nasabing bayan.
Ayon sa imbestigasyon ng Surallah Police, nag-iinuman sa bahay ng mga biktima ang suspek at biyenan nito na si Benevicto habang nasa loob din ng bahay sina Hapelina at Victoria na nanonood ng telebisyon, pasado alas-8:00 ng gabi nang biglang magkaroon ng pagtatalo sa pagitan ng magbiyenan.
Kinompronta umano ni Benevicto ang manugang na si Dones na umano’y batugan at kung bakit hindi maghanap ng trabaho dahil meron na siyang pamilya. Gayunman, minasama ng manugang ang paninita ng biyenang lalaki hanggang sa bigla na lang umanong tumayo ang una at kumuha ng itak at pinagtataga ang biyenan. Hindi pa nakuntento, isinunod na kinatay ng suspek ang biyenang babae at si Victoria.
Nitong Linggo, sumuko ang suspek sa isang barangay kagawad at ngayo’y nakapiit sa Surallah Police detention cell.
- Latest