‘Pusher’ tumba,‘most wanted’ huli
CAMP ALEJO SANTOS, Bulacan, Philippines – Patay ang isang pinaghihinalaang tulak ng ilegal na droga sa bayan ng Plaridel habang arestado ang tinaguriang No. 4 Most Wanted Person sa Capiz sa magkahiwalay na police operations dito sa lalawigan kahapon.
Sa ulat na isinumite kay P/Col. Emma Libunao, acting Bulacan Provincial director, kinilala ang napatay na si Rommuel Garife alyas “Mome”, nasa hustong gulang at kabilang sa Top 8 Lambat Sibat provincial level drug watchlist.
Base sa report, ala-1:05 ng madaling araw nang magsagawa ng buy-bust operation laban kay Garife sa Brgy. Agnaya, Plaridel. Naghinala ang suspek na mga pulis ang kanyang ka-deal kaya mabilis nitong pinaputukan ng baril ang mga operatiba habang tumakas ang kasama nito lulan ng motorsiklo patungong Brgy. Lumang Bayan, Plaridel. Agad na gumanti ng putok ang mga operatiba sanhi ng agarang pagkamatay ni Garife.
Narekober sa crime scene ang isang kalibre .35, 14 plastic sachet ng shabu, cellphone, drug money na P557 at marked money na ginamit sa buy-bust.
Samantala, nasakote ng pinagsanib na puwersa ng Bulacan Crime Investigation and Detection Group (CIDG), PROACT-Capiz Police Provincial Office (PPO), ang No. 4 most wanted sa Capiz na si Navigar Gardocerial alyas “Dodong”, 48, ng Brgy. Gulod Maragondon, Cavite sa bisa ng dalawang warrant of arrest sa kasong murder at walang kaukulang piyansa.
- Latest