8 beerhouse ipinasara sa Quirino

Dahil sa sakit na nakakahawa

TUGUEGARAO CITY,  Cagayan, Philippines — Ikinandado ng mga awtoridad ang walong beerhouse sa Aglipay, Quirino matapos bawiin ng pamahalaang lokal ang lisensya ng mga ito dahil sa banta ng sexually transmitted diseases (STDs) kamakalawa. 

Sinabi ni Captain William Agpalsa, hepe ng Aglipay Police Station na ang closure order na iniutos ni Mayor Jerry Agsalda ay bunga ng paglabag ng mga operator ng mga beerhouses sa sanitasyon at kalusugan.

Mabigat man sa loob dahil sa kawalan ng pagkakakitaan at pagsusumamo ng mga namamasukan sa beerhouse, sinabi ni Agpalsa na tungkulin niyang ­ipatupad ang batas matapos na dumagsa ang reklamo ng ilang mga parokyano ng mga bahay aliwan na nahawa ng STD na nakukuha sa pakikipagtalik sa mga guest relations officer na karamihan ay mga “free lancer” at hindi dumadaan sa regular check up sa Municipal Health Office.

Bunga ng sitwasyon, nauuwi sa away mag-asawa ang dulot ng mga naturang bahay aliwan kung kaya’t napagpasyahan na ni Mayor Agsalda na tuldukan na ang operasyon ng mga beerhouses sa teritoryo nito.